மார்க்சிஸ்ட் இதழ்களின் கருவூலம்


‘மார்க்சிஸ்ட்’ தத்துவார்த்த மாத இதழ்கள், வெளியான காலத்தில் இருந்து 2021 வரையில், அச்சு இதழ்களை அப்படியே எண்ணியல் (டிஜிட்டல்) வடிவத்திற்கு மாற்றப்பட்டுள்ளது. இந்த கோப்புகள் இனி ஆய்வாளர்கள், பொதுமக்கள் பயன்பாட்டிற்கு இணையத்தில் கிடைக்கும்.

தமிழகத்தின் பல்வேறு துறைகளில் ஆவணங்களை டிஜிட்டல் வடிவத்திற்கு மாற்றி பாதுகாக்கும் மகத்தான பணியை மேற்கொண்டுள்ளது. ரோஜா முத்தையா ஆராய்ச்சி நூலகம்.

சி.பி.ஐ(எம்) கருவூலம் முயற்சியில், சென்னை ரோஜா முத்தையா ஆராய்ச்சி நூலகத்துடன் இணைந்து மார்க்சிஸ்ட், செம்மலர் மற்றும் தீக்கதிர் இதழ்கள் டிஜிட்டல் வடிவில் ஆவணப்படுத்தப்படுகின்றன.

தெற்காசிய திறந்தவெளி மின்னணு காப்பகம் என்ற அமைப்பு உலகளாவிய முறையில் கலை, மானுடவியல், சமூக அறிவியல் உள்ளிட்ட பல துறைகளில் தெற்காசிய மொழிகள் மற்றும் ஆங்கிலத்தில் வெளியாகியுள்ள ஏடுகள், நூல்கள், செய்தித் தாள்கள், கணக்கெடுப்பு தரவுகள் உள்ளிட்ட எண்ணற்ற ஆவணங்களை தொகுக்கும் பணியில் ஈடுபட்டுள்ளது.

ஜேஎஸ்டிஓஆர் (JSTOR) எனும் இணைய நிறுவனத்துடன் கூட்டு மேற்கொண்டு, உலகளாவிய வாசகர்களுக்கு மேற்கண்ட பல்வேறு துறைகளின் ஆவணங்களை டிஜிட்டல் முறையில் (பிடிஎப் உள்ளிட்ட வடிவங்களில்) முற்றிலும் இலவசமான முறையில் அளிக்கும் மகத்தான பணியை செய்து வருகிறது. இதில் தற்போது மார்க்சிஸ்ட் இதழ்கள் இடம்பெற்றுள்ளன.

https://www.jstor.org/site/south-asia-open-archives/saoa/mrkcis-33856030/

என்ற இணைய முகவரியில் இதழ்கள் பதிவேற்றம் செய்யப்பட்டுள்ளன. ஏற்கெனவே ரோஜா முத்தையா நூலகத்தின் உதவியுடன் தீக்கதிர் நாளிதழின் முதல் இதழான 1963 ஜுன் 29 இதழ் தொடங்கி 1977 வரையிலான இதழ்கள் டிஜிட்டல் மயமாக்கப்பட்டுள்ளன என்பது குறிப்பிடத்தக்கது. விரைவில் நமது மார்க்சிஸ்ட் இதழிலும், தேர்ந்தெடுக்கப்பட்ட கட்டுரைகள் எழுத்து மற்றும் ஒலி வடிவில் வெளியாகும்.

  • மார்க்சிஸ்ட்

நவம்பர் 2019 மார்க்சிஸ் இதழில் …

நவீன தாராளமய முதலாளித்துவமும், மூன்றாம் உலக நாடுகளின் வறுமையும்” என்ற பேரா. பிரபாத் பட்நாயக் அவர்களின் கட்டுரை முதலாளித்துவத்தின் வளர்ச்சிப்போக்கு எந்த வகையிலும் மூன்றாம் உலக நாடுகளின் வறுமையை ஒழித்துவிடாது என்பதையும், உண்மையில், இந்நாடுகளின் வறுமை மேலும் அதிகரிக்கவே செய்கிறது என்பதையும் நிறுவுகிறது. அதேபோல் இந்நாடுகளில் உண்மையான ஒரு புரட்சிகர  மாற்றை உருவாக்க தொழிலாளி – விவசாயிகளின் கூட்டணியின் அவசியத்தையும் வலியுறுத்துகிறது. இக்கட்டுரையை ஆர்.எஸ்.செண்பகம் சுருக்கமாகத் தமிழில் மொழிபெயர்த்துள்ளார்.

கடந்த இதழில் குறிப்பிட்டிருந்தது போல் இந்திய கம்யூனிஸ்ட இயக்கத்தின் நூற்றாண்டை சிறப்பிக்கும் வகையில்   இவ்விதழில் இரண்டு கட்டுரைகள் வெளியாகின்றன. ஒன்று, உ. வாசுகி எழுதியுள்ள  “வெகுஜனப் பாதையும் மார்க்சிஸ்ட் கட்சிக் கிளைகளும்” என்பதாகும். வெகுஜன மக்கள் மத்தியில் கட்சியின் கருத்துக்களை எடுத்துச் சென்று மக்கள் மத்தியில் கட்சியின் செல்வாக்கை உயர்த்துவதிலும், மக்களிடமிருந்து கற்றுக்கொண்டு  மக்களுக்கு  செயலாற்றுவதிலும் கட்சிக் கிளைகளின் முக்கிய பங்கினை இக்கட்டுரை விளக்குகிறது. 

இரண்டு, என்.குணசேகரன் எழுதியுள்ள “முழு விடுதலை-லட்சியத்தின் வீர வரலாறு என்ற கட்டுரையாகும். முழு விடுதலை என்கிற முழக்கத்தை இந்திய விடுதலை போராட்ட களத்தில் முதன் முதலில் ஒலித்தவர்கள் கம்யூனிஸ்டுகளே. அதுவும் கம்யூனிஸ்ட் இயக்கம் துவங்கப்பட்ட அடுத்த ஆண்டே அந்த முழக்கம் எழுப்பப்பட்டது. அதற்கான காரணம் கம்யூனிஸ்ட் இயக்கங்களுக்கு இருந்த தத்துவார்த்த தெளிவே ஆகும். முழு விடுதலை என்கிற இம்முழக்கத்தின் வளர்ச்சி மற்றும் நீட்சிகளை இக்கட்டுரை எடுத்துரைக்கிறது.

மார்க்சிய மூலவர்களில் ஒருவரான தோழர் எங்கெல்ஸ் (28 நவம்பர் 1820 – 5 ஆகஸ்ட்1895) அவர்கள்  பிறந்த 200வது ஆண்டை சிறப்பிக்கும் வகையில் பாலசுப்பிரமணியன் –  ரகுராம் நாராயணன் எழுதியுள்ள “எங்கெல்ஸ் என்ற புரட்சியாளன்” என்ற கட்டுரை வெளியாகிறது. எங்கெல்ஸ் அவர்களின் தத்துவார்த்த பங்களிப்போடு, அவரின் களச் செயல்பாடும், மார்க்ஸ்-எங்கெல்ஸ் காலத்தில் நடந்த போராட்டங்களில் அவர்களின் பங்கேற்பும் இதில் விவரிக்கப்பட்டுள்ளது.

பொருளியல் துறைக்கான  2019-ம் ஆண்டு நோபல் பரிசு    அபிஜித் பானெர்ஜீ, எஸ்தர் டுஃப்ஃப்ளோ, மற்றும் மைக்கேல் க்ரேமெர் ஆகிய மூன்று பொருளாதார நிபுணர்களுக்கு அளிக்கப்பட்டுள்ளது. “வறுமைக்கான காரணங்கள் உற்பத்திக் கருவிகளின் உடைமையில் உள்ள மாபெரும் ஏற்றத்தாழ்வுகள், வேலை வாய்ப்பு, கூலி, அரசுகளின் ஒட்டுமொத்த பொருளாதார சமூக கொள்கைகள் என்று பலவற்றாலும் நிர்ணயிக்கப்படுகின்றன. இவற்றை எல்லாம் புறந்தள்ளிவிட்டு ஒரு பெரும் சமூக பிரச்சினையை ஒரு குறிப்பிட்ட இடத்தில் வறுமை எதிர்ப்பு நடவடிக்கையின் தன்மையில் சிறு மாற்றத்தை மட்டுமே கொணர்ந்து தீர்க்க முயலும் அணுகுமுறை எந்த வகையிலும் பயன் தராது” என்பதை  “நோபல் பரிசு 2019 – ஒரு விமர்சனப் பார்வை” என்கிற பேராசிரியர் வெங்கடேஷ் ஆத்ரேயாவின் கட்டுரை முன்வைக்கிறது.

சொல்லகராதி பகுதியில் உற்பத்தி முறை பற்றிய மார்க்சின் மேற்கோள் இடம் பெற்றிருக்கிறது.

நவம்பர் 9 ஆம் தேதி தூத்துக்குடியில்  நடைபெற்ற  நவம்பர் புரட்சி தின நிகழ்வில் தென் மாவட்டங்களில் இருந்து பங்குபெற்ற தோழர்கள்  மார்க்சிஸ்ட் சந்தாக்களை ஒப்படைத்துள்ளனர். மேலும் மார்க்சிஸ்ட் இதழில் சாதி, இடஒதுக்கீடு, அடையாள அரசியல் குறித்து வெளியான கட்டுரைகளை தொகுத்து பாரதி புத்தகாலயம் வெளியிட்டுள்ள “சாதி, இடஒதுக்கீடு, அடையாள அரசியல் பற்றி…” என்ற நூலும் இந்த நிகழ்வில் வெளியிடப்பட்டது.

– ஆசிரியர் குழு    

இந்திய கம்யூனிஸ்ட் இயக்க நூற்றாண்டு சிறப்பிதழ் (அக்டோபர் 2019)

இம்மாத இதழ் இந்திய கம்யூனிஸ்ட் இயக்கத்தின் நூற்றாண்டு சிறப்பிதழாகக் கொண்டுவரப்பட்டுள்ளது. இந்நூற்றாண்டை சிறப்பிக்கும் வகையில் அடுத்த ஓராண்டுக்கு முக்கியமான பல கட்டுரை களை நமது மார்க்சிஸ்ட் இதழில் கொண்டுவரத் திட்டமிட்டுள்ளோம் .

1920-ம் ஆண்டு அக்டோபர் மாதம் 17-ம் தேதி அப்போதைய சோவியத் ரஷ்யாவில் அமைந்திருந்த தாஷ்கண்ட் நகரில் இந்திய கம்யூனிஸ்ட் கட்சியின் முதல் கிளை துவக்கப்பட்டது. இதைத் தொடர்ந்தே 1925-ம் ஆண்டு இந்திய கம்யூனிஸ்ட் கட்சி “Communist Party of India” இந்தியாவில் துவங்கப்பட்டது.

இந்திய கம்யூனிஸ்ட் இயக்கம் குறித்த ஆவணங்கள் ” என்ற விரிவான ஆவணத் தொகுப்பில் 1920-ம் ஆண்டு துவக்கப்பட்ட முதல் கிளை குறித்த ஆவணங்களை அதன் முதல் தொகுதியில் வெளியிட்டுள்ளது. அதில் இந்த கிளை அமைப்பு குறித்த மூன்று ஆவணங்கள் உள்ளன.

இந்த ஆவணங்கள் அனைத்தும் “இந்திய கம்யூனிஸ்ட் இயக்கம் உருவான வரலாறு” என்ற தலைப்பில் வெளியாகியுள்ள இவ்விதழின் முதல் கட்டுரைக்கு இடையே தனியாக பிரசுரிக்கப்பட்டுள்ளது. இக்கட்டுரை இந்திய கம்யூனிஸ்ட் இயக்கத்தின் 75-ம் ஆண்டு கொண்டாட்டத்தின்போது எழுதப்பட்டதாகும். வரலாற்றுச் சான்றாவணங்களுடன் தனது நெடிய இயக்க அனுபவத்தோடு தோழர் ஹர்கிசன்சிங் சுர்ஜித் இக்கட்டுரையை எழுதியுள்ளார்.

இந்திய கம்யூனிஸ்ட் இயக்கத்திற்கு, தமிழகத்தில் வாழ்ந்த தென்னிந்தியாவின் முதல் கம்யூனிஸ்டும், இந்திய கம்யூனிஸ்ட் கட்சியின் முதல் மாநாட்டின் தலைவருமான தோழர் சிங்காரவேலரின் பங்களிப்பு அளப்பரியதாகும். “சிங்காரவேலரும் இந்திய கம்யூனிச இயக்கத்தின் தோற்றமும்” என்ற பி.கோவிந்தப்பிள்ளை அவர்களின் கட்டுரை அதை எடுத்துரைக்கிறது. இதில் சிங்காரவேலரின் பங்களிப்பு குறிப்பிடப்படுவதோடு உலக அனுபவங்களுடன் வளர்ந்த இந்திய கம்யூனிச இயக்கத்தின் வளர்ச்சியும் விரிவாக விளக்கப்பபட்டுள்ளது.

ஃபிரண்ட்லைன் இதழுக்கா க.ஜிப்ஸன் ஜான், ஜிதேஷ் பி.எம் ஆகியோர் பே ரா.அய்ஜா ஸ் அகமத் உடன் நடத்திய பே ட்டியின் அடுத்த பகுதியான “உலக, இந்திய இடதுசாரி இயக்கங்கள் ” என்ற பகுதி இவ்விதழில் வெ ளியாகிறது. இந்திய கம்யூனிச இயக்கத்தின் நூறா ண்டு நிகழ்வுகள் குறித்து சிந்திக்கும் இத்தருணத்தில் அய்ஜாஸ் அகமதுவின் இடதுசாரிகளின் பங்கு பற்றிய கருத்து முக்கியத்துவம் பெ றுகிறது.

இந்திய மண்ணில் கம்யூனிஸ்ட் இயக்கததை துவங்கியதில் முக்கிய பங்கு வகித்த தோழர் அமீர் ஹைதர்கான் அவர்களின் வாழ்க்கைப் பயணத்தை, தீரம்மிக்க இயக்க பங்களிப்பை விளக்கும் கட்டுரை யாக இரா. சிந்தன் எழுதியுள்ள “அடிமைச் சங்கிலியைத் தகர்த்த தாதா அமீர் ஹைதர்கான்” எனும் கட்டுரை அமைந்துள்ளது.

  • ஆசிரியர் குழு

செப்டம்பர் 2019 மார்க்சிஸ்ட் இதழில் …

உற்பத்தி துறைகளை பெரு நிறுவனங்கள் கபளீகரம் செய்வது குறித்தும், அதன் விளைவுகள் குறித்தும் “முதலாளித்துவம், சோசலிசம், சிறு உற்பத்தித் துறைகள்” என்ற கட்டுரை விவாதிக்கிறது. இது அதிபர் ஜுலியஸ் நெய்ரே பெயரில் நடத்தப்பட்ட கருத்தரங்கில் பேரா. பிரபாத் பட்நாயக் பேசியதன் ஒரு பகுதியாகும்.

வாகன உற்பத்தி துறையில் ஏற்பட்ட வேலை இழப்பு இன்னும் தொடர்ந்துகொண்டே வருகிறது. ரூபாயின் மதிப்பு சரிந்து வருகிறது. இந்திய பொருளாதாரத்தின் வளர்ச்சி விகிதம் குறைந்துள்ளது. இதற்கான காரணங்களையும் அதற்கான உண்மையான மாற்றையும் முன்வைத்து பேரா. வெங்கடேஷ் ஆத்ரேயாவின் “இந்திய பொருளாதாரத்தின் மந்தநிலை” என்கிற கட்டுரை விளக்குகிறது.

தண்ணீர் தனியார் மயமாவதின் அரசியலையும் அதன் ஆபத்தையும் விளக்குவதோடு, அதன் உலக மற்றும் இந்திய அனுபவங்களை மேற்கோள் காட்டி நமது உள்ளூர் வரை அதன் தாக்கத்தை அ. இராசகோபால் எழுதிய “தமிழகத்தில் குடிநீர் பிரச்சினை: தனியார் மயம் மற்றும் உலகமயம் உணர்த்தும் பாடங்கள்” என்கிற கட்டுரை எடுத்துரைக்கிறது.

காஷ்மீர் பிரச்சனை குறித்தான சில கேள்விகளுக்கு மார்க்சிஸ்ட் கட்சியின் மத்தியக் குழு உறுப்பினர் டி.கே. ரங்கராஜன் எம்.பி. அவர்களின் பதில்கள் “ஆர்.எஸ்.எஸ் விரும்பும் அகண்ட பாரதமும்.
காஷ்மீர் பிரச்சனையும்
” என்கிற தலைப்பின் கீழ் வெளியாகிறது.

ஃப்ரண்ட்லைன் இதழுக்காக ஜிப்ஸன் ஜான், ஜிதேஷ் பி.எம் ஆகியோர் பேராசிரியர் அய்ஜாஸ் அகமத் உடன் நடத்திய பேட்டியின் அடுத்த பகுதி “இந்துத்துவாவின் தாக்குதல்கள்” என்கிற தலைப்பில் இந்த இதழில் வெளியாகிறது.

மார்க்சிஸ்ட் இதழுக்கான சந்தா சேர்ப்பு இயக்கமும், ஒப்படைப்பு நிகழ்ச்சிகளும் பல மாவட்டங்களிலும் நடைபெற்று வருகிறது. தோழர்கள் அதில் முழுமையாக ஈடுபட்டு சந்தாவை அதிகரிக்க கூடுதல் முயற்சி எடுக்குமாறு கேட்டுக் கொள்கிறோம்.

ஆசிரியர் குழு

ஆகஸ்ட் 2019 மார்க்சிஸ்ட் இதழில் …

இந்தியாவின் பன்முகத்தன்மையை முற்றாக அழித்து ஆர்.எஸ்.எஸ்- இன் ஒற்றை பண்பாட்டை திணிக்கும் வேலையை மத்திய பா.ஜ.க அரசு அனைத்து வழிகளிலும் செய்து வருகிறது. ஒரே நாடு-ஒரே மொழி, ஒரே நாடு – ஒரே ரேஷன் அட்டை, ஒரே நாடு ஒரே சட்டம் போன்ற வார்த்தை ஜாலங்களோடு, தீவிர முதலாளித்துவ சுரண்டலுக்கும் அது வசதி செய்து தருகிறது. மாநிலங்களின் உரிமைகளை தகர்ப்பது, கல்வி, வேலை உள்ளிட்ட பொதுப்பட்டியலில் உள்ள விஷயங்களில் கூட மாநில அரசுகளை கலந்தாலோசிக்காமல் பல்வேறு சட்டத் திருத்தங்களை தனது நாடாளுமன்ற பலத்தைக் கொண்டு நிறைவேற்றுவதும் நடைபெற்று வருகிறது.

அனைத்திற்கும் உச்சமாக ஜம்மு-காஷ்மீர் மாநிலத்தின் சிறப்பு அந்தஸ்தை ரத்து செய்து, லடாக்-ஐ சட்டமன்றமற்ற யூனியன் பிரதேசமாகவும், ஜம்மு-காஷ்மீர் பகுதியை சட்டமன்றமுள்ள யூனியன் பிரதேசமாகவும் மாற்றி, தனது மைய அதிகாரத்தை விரிவுபடுத்தும் போக்கை எதேச்சதிகாரத் தன்மையோடு பா.ஜ.க அரசு அமலாக்கியுள்ளது. மத்திய அரசின் இத்தகைய அரசியல் சார்ந்த அதிகார மையப்படுத்தலை உ.வாசுகி அவர்களின் அதிகாரக் குவிப்பும் அத்துமீறல்களும்” என்ற கட்டுரை விரிவாகப் பேசுகிறது. அடுத்த இதழில் பொருளாதார அம்சங்களில் மத்திய அரசின் மையப்படுத்தும் அதிகாரம் குறித்த கட்டுரை வெளியாகும்.

ஆனந்த் டெல்டும்டெவின் “சாதிக் குடியரசு” என்ற நூலை முன்வைத்து என்.குணசேகரன் அவர்களின் கட்டுரை ஒன்றை கடந்த இதழில் வெளியிட்டிருந்தோம். அதன் தொடர்ச்சியாக “சாதி, வர்க்கம், இயக்கங்கள்” என்கிற கட்டுரை இவ்விதழில் வெளியாகிறது. இது சாதி, வர்க்கம் பற்றிய அம்பேத்கரின் நிலைபாடு, தலித் இயக்கங்களின் தற்போதைய நிலை, இடதுசாரிகள் மீதான டெல்டும்டேவின் விமர்சனம் ஆகியவை குறித்து விவாதிக்கிறது.

ஜிப்ஸன் ஜான், ஜிதேஷ் பி.எம் ஆகியோர் ஃப்ரண்ட்லைன் இதழுக்காக இந்தியாவின் தலைசிறந்த பேராசிரியர் அய்ஜாஸ் அகமத் உடன் ஒரு விரிவான உரையாடலை மேற்கொண்டனர். அந்த பேட்டியில் பாசிசம் குறித்தும், பா.ஜ.க வின் தற்போதைய வெற்றி குறித்தும், இடதுசாரிகள் குறித்தும் ஆழமான கருத்துக்களை அய்ஜாஸ் அகமத் வெளியிட்டிருந்தார். அதன் ஒரு பகுதி “உள்ளிருந்தே கைப்பற்றப்பட்ட அரசு” என்ற தலைப்பில் இந்த இதழில் வெளியாகிறது.

மத்திய அரசின் தேசிய கல்விக் கொள்கையின் வரைவு அறிக்கை அதிகார மையப்படுத்தல், காவிமயமாக்கல் மற்றும் தனியார் மயமாக்கல் என்பதை உள்ளடக்கியதாக அமைகிறது. அதன் அபத்தங்களையும், கல்வி குறித்த கம்யூனிஸ்டுகளின் பார்வையையும் விளக்கி ஜி.செல்வாவின் “கல்வியும் கம்யூனிஸ்டுகளும்” என்ற கட்டுரை பேசுகிறது.

எங்கெல்ஸ் மறைந்து 124 ஆண்டுகள் முடிந்துள்ளன. அவர் மறைவின் 125 ஆம் ஆண்டின் தொடக்கத்தை நினைவு கூரும் வகையில் எங்கெல்ஸ் குறித்து “மார்க்சியத்தின் அடித்தளம் எங்கெல்ஸ்” என்ற கட்டுரையை ச.லெனின் எழுதியுள்ளார். மார்க்ஸ் எங்கெல்ஸ் என்று அவர்கள் இணைந்தே அறியப்பட்டதன் காரணமும், உலகின் முதல் மார்க்சிஸ்ட் ஆன எங்கெல்சின் பங்களிப்பும் இக்கட்டுரையில் விளக்கப்பட்டுள்ளது.

பல மாவட்டங்களில் மார்க்சிஸ்ட் இதழுக்கான சந்தா ஒப்படைப்பு நிகழ்ச்சிகள் திட்டமிடப்பட்டுள்ளது. தோழர்கள் தங்கள் மாவட்டங்களில் கூடுதலான சந்தாக்களை சேர்த்து ஒப்படைக்க தேவையான முயற்சிகளை மேற்கொள்ளுமாறும், மார்க்சிஸ்ட் வாசகர் வட்டங்களில் வரும் கருத்துக்களை ஆசிரியர் குழுவிற்கு அனுப்புமாறும் கேட்டுக்கொள்கிறோம். – ஆசிரியர் குழு

ஜூலை 2019 மார்க்சிஸ்ட் இதழில் …

கடந்த நாடாளுமன்ற தேர்தலில் வலதுசாரி சக்திகள் வலுவான ஒரு வெற்றியை ஈட்டின. இந்த வெற்றி அவர்களுக்கு எவ்வாறு சாத்தியமானது என்பதையும், அதற்கு அவர்கள் ஊடகத்தினையும், சமூக வலைத் தளங்களையும், இன்னும் பல்வேறு சக்திகளையும் எவ்வாறெல்லாம் தொடர்ந்து பயன்படுத்தி வருகின்றனர் என்பவை உள்ளிட்ட பல்வேறு தகவல்களை கொண்ட கட்டுரையாக தோழர் சுகுமார் முரளிதரன் எழுதிய ஊடகம், விளம்பரம், தேர்தல் : உலகமயமாக்கலுக்கு இரையாகிப் போன நம்பகத்தன்மை என்கிற கட்டுரை அமைந்துள்ளது.

சாதி, இடஒதுக்கீடு, உலகமயத்தின் தாக்கம், தலித் அரசியல் கட்சிகளின் செயல்பாடு, கம்யூனிஸ்ட் இயக்கங்களின் செயல்பாடு உள்ளிட்டவை குறித்து “சாதிக் குடியரசு” என்ற ஒரு விரிவான நூலை ஆய்வாளர்ஆனந்த் டெல்டும்டே எழுதியுள்ளார். சாதி, இடஒதுக்கீடு குறித்து ஆனந்த் டெல்டும்டே இந்நூலில் கூறியுள்ள கருத்துக்களை மட்டும் எடுத்துக் கொண்டு “சமகாலத்தில் சாதியும், இட ஒதுக்கீடும்“ என்ற தோழர்.என் குணசேகரன் எழுதியுள்ளகட்டுரை விவரிக்கிறது. நூலில் இடம்பெற்றுள்ள பல்வேறு கருத்துக்கள் சமகால வளர்ச்சிப்போக்கில் கூடுதல் முக்கியத்துவம் பெறுவதைக் கருத்தில் கொண்டு சாதி-வர்க்க உறவு, இந்துத்துவா போன்றவை குறித்துடெல்டும்டே இந்நூலில் முன்வைத்துள்ள கருத்துக்களை அடிப்படையாகக் கொண்ட கட்டுரைகள் வரும் இதழ்களில் வெளியாகும்.

நவீன நாடகம், நவீன சினிமா, நவீன இலக்கியம் ஆகிய துறைகளில் முத்தாய்ப்பான பல சாதனைகளை படைத்தவர் கிரீஷ் கர்னார்ட். உடல் நலக்குறைவுக்கு இடையிலும் சமூக தளத்தில் முற்போக்கு செயல்பாட்டில் தொடர்ந்து ஈடுபட்டு வந்தவர் அவர். நவீன இந்தியாவில் அவரின் பங்களிப்புகளை நினைவுகூரும் வகையில் தோழர் பிரளயன் எழுதியுள்ள “அதிகாரத்தின் தாழ்வாரங்களில் வலம் வந்த போதிலும்” என்ற கட்டுரை இந்த இதழில் வெளியாகிறது.

மனித குல மேம்பாட்டிற்காகவே அனுதினமும் சிந்தித்து செயலாற்றி வந்த மார்க்ஸின் வாழ்க்கை முழுவதுமே கடும் சோதனைகளும் போராட்டங்களும் நிறைந்ததுதான் என்பதை நாம் அறிவோம். மார்க்ஸின் இறுதிக்காலம் நம்மை கலங்கடிக்கும் பல சம்பவங்களை கொண்டது. இதனைஆய்வாளர் மார்சலொ முஸ்டோவின் மூலதனத்தின் தோற்றம் என்ற நூல் விரிவாக விளக்கும். பீப்பிள்ஸ் டெமாக்ரசியில் தொடர்ந்து வெளியாகிய “மார்க்ஸின் இறுதி ஆண்டுகள்” என்கிற தொடரின் முழுமையான பகுதி இவ்விதழில் கட்டுரையாக வெளிவருகிறது.

பல மாவட்டங்களில் மார்க்சிஸ்ட் சந்தா சேர்ப்பு இயக்கம் மிகச் சிறப்பாகத் தொடங்கியுள்ளது. தூத்துக்குடி, திருநெல்வேலி மாவட்டங்கள் பல நூற்றுக்கணக்கில் சந்தாக்களை திரட்டி ஆசிரியர் குழுவிடம் ஒப்படைத்துள்ளனர். மற்ற மாவட்டங்களிலும் தொடர்ந்து நடைபெற்று வரும் முயற்சிகள் பற்றிய தகவல் இந்த இதழில் வெளியாகிறது. இந்த முயற்சியில் ஈடுபட்ட தோழர்களுக்கு ஆசிரியர் குழு மனமார்ந்த பாராட்டுக்களை தெரிவித்துக் கொள்கிறது. மார்க்சிஸ்ட் இதழின் சந்தாவை மேலும்உயர்த்திட மற்ற மாவட்ட தோழர்களும் வாசகர்களும் கூடுதல் முயற்சி எடுக்குமாறு கோரும் அதே நேரத்தில் மார்க்சிஸ்ட் இதழ் குறித்து வாசகர் வட்டங்களில் வெளியாகும்கருத்துக்களையும் ஆலோசனைகளையும் ஆசிரியர் குழுவிற்கு தெரிவிக்குமாறும் கேட்டுக் கொள்கிறோம்
– ஆசிரியர் குழு

ஜூன் 2019 மார்க்சிஸ்ட் இதழில் …

உலகமயமாக்கல் காலத்தில் அதற்கு முந்தைய காலத்தைவிட நிலம் என்பது முதலாளித்துவத்தின் மூலதனத்  திரட்சிக்கான முக்கிய ஆதாரமாக விளங்குகிறது. ஏழை எளிய மக்களிடமிருந்து அரசே கார்ப்பரேட்டுகளுக்கு பிடுங்கிக் கொடுக்கிறது. காலனிய ஆட்சியின்போது  நிலம் கையகப்படுத்தும் சட்டத்தின் தன்மை, கடந்த ஐக்கிய முற்போக்கு கூட்டணி ஆட்சியின் போது கொண்டுவரப்பட்ட  சட்டம், தற்போதைய பிஜேபி அரசு அதில் செய்துள்ள மோசடித்தனமான மாற்றங்கள் பற்றியும், நிலம் கையகப்படுத்தலுக்கு எதிராக மக்களின் நாடுதழுவிய  வலுவான போராட்டங்கள், அதன் வெற்றிகள் மற்றும் அதன் தேவைகள் பற்றி அகில இந்திய விவசாயிகள் சங்கத்தின் இணைச் செயலாளர் தோழர் விஜூ கிருஷ்ணன் அவர்களின் கட்டுரையின் முதல்பகுதி விரிவாக பேசுகிறது.

கம்யூனிஸ்ட் கட்சிகளுக்கு, குறிப்பாக மார்க்சிஸ்ட் கட்சிக்கு, சமீபத்திய தேர்தலில் கிடைத்த படிப்பினைகள், வலதுசாரிகளின் வெற்றியால் நாடு சந்திக்கவிருக்கும் சவால்கள், நாம் ஆற்ற வேண்டிய பணிகள் குறித்து கட்சியின் மத்திய குழுவின் தேர்தல் பரிசீலனையை உள்ளடக்கியதாக தோழர் உ.வாசுகி அவர்களின் “17வது மக்களவை தேர்தல் முடிவுகள்: பின்னுக்குத் தள்ளப்பட்ட வாழ்வுரிமை பிரச்சனைகள் – உறுதிப்படுத்தப்பட்ட வலதுசாரித் திருப்பம்” கட்டுரை அமைந்துள்ளது.

சாதி மற்றும் இதர சமூக ஒடுக்குமுறைகளுக்கு எதிராகவும், அரசியல் போராட்டங்களையும், வர்க்க போராட்டங்களையும் ஒன்றிணைத்தும் கொண்டு சென்ற தனது அனுபவங்களை தோழர் இ.எம்.எஸ் அவர்களின் “மீண்டுமொருமுறை சாதிகள், வர்க்கங்கள் குறித்து…” என்ற கட்டுரை பேசுகிறது.

தேர்தல் தோல்வியை ஒட்டுமொத்த தோல்வியாக பார்க்கும் போக்கை கடந்து, தேர்தலை எவ்வாறு பார்க்க வேண்டும்; முழுமையான சமூக விடுதலையை தேர்தல் மூலமாக மட்டுமே அடைந்து விட முடியாது என்கிற அதே நேரத்தில், தேர்தலை கம்யூனிஸ்டுகள் எப்படி அணுக வேண்டும் என்பதை விளக்கிடும் மார்க்ஸ் மற்றும் எங்கல்சின் கருத்துக்களை உள்ளடக்கியதாக தோழர் வீ.பா. கணேசன் அவர்களின் “தேர்தல் பற்றி மார்க்சும் எங்கல்சும்” என்கிற கட்டுரை அமைகிறது.

மார்க்சிய இயக்கவியல் பொருள்முதல் வாதத்தின் உண்மை தன்மையை நவீன அறிவியல் வளர்ச்சி தொடர்ந்து நிரூபித்து வருகிறது. அறிவியல் கண்டுபிடிப்புகள் ஒவ்வொன்றுமே உலகம் குறித்த மனிதனின் புரிதலை மேலும் விரிவுபடுத்துகிறது. இது முடிவில்லாமல் வளர்ந்து கொண்டும் வருகிறது. அத்தகைய ஒரு சிறந்த கண்டுபிடிப் பான கருந்துளை பற்றிய விளக்கங்களைத் தருவதாக “கருந்துளை: அறிதல், அறிவியல், இயக்கவியல் பொருள்முதல்வாதம்” என்கிற தோழர் இரா. சிந்தன் எழுதிய கட்டுரை அமைகிறது.

வாசகர்கள் மார்க்சிஸ்ட் இதழின் சந்தாவை உயர்த்திட முனையுமாறும், இதழ் குறித்து வாசகர் வட்டங்களில் வெளிவரும் கருத்துக்களையும் ஆலோசனைகளையும் ஆசிரியர் குழுவிற்கு தெரிவிக்குமாறும் கேட்டுக்கொள்கிறோம்.

-ஆசிரியர் குழு

மே 2019 மார்க்சிஸ்ட் இதழில் …

வரலாற்று சிறப்பு மிக்க தொழிலாளர் தினத்தை உலகமே உற்சாகமாக கொண்டாடியது. இந்த கொண்டாட்டங்கள் உலகம் முழுவதும் உள்ள தொழி லாளர்களின் போராட்டக்கனலின் வெளிப்பாடாகவே எழுந்து நிற்கிறது. ஏகாதிபத் தியங்களின் லாப வெறி உழைக்கும் மக்களை மேலும், மேலும் சுரண்டிக் கொழுக் கிறது. எப்போதும்போல் தொழிலாளி வர்க்கமும் அதற்கேற்ற வகையில் எதிர்த்து நிற்கிறது. பல நாடுகளில் வலதுசாரிகள் ஆட்சி அதிகாரத்தை பிடித்த அதே நிலை இந்தியாவிலும் ஏற்பட்டது. இந்திய தொழிலாளி வர்க்கமும் தனது நேச அணியான விவசாயிகளை தன்னோடு இணைத்துக்கொண்டு  தற்போது வலுவாக களம் காண்கிறது. இந்த வளர்ச்சிப்போக்குகளை மிக ஆழமாகவும், எளிமையாகவும் தோழர் சிந்துவின்  “ஏகாதிபத்திய தாக்குதலும், உழைக்கும் வர்க்க எதிர்ப்பும்” என்ற கட்டுரை விளக்கு கிறது. தோழர் ஜி.பாலச்சந்திரன் அதை மிக சிறப்பாக தமிழில் வழங்கியுள்ளார்.

கடந்த இதழில் வெனிசுவேலாவை மையப்படுத்தி உலக நிகழ்வுகளிலும் மற்ற நாடுகளிலும் ஏகாதிபத்தியத்தின் தலையீட்டை விளக்கி பேரா. பிரபாத் பட்நாயக் எழுதிய கட்டுரையை வாசகர்கள் படித்திருப்பீர்கள். அதன் தொடர்ச்சியாக வெனிசுவேலாவில்  ஏகாதிபத்தியத்தின் தலையீட்டை “மீண்டும் வருமா வெனிசு வேலா?” என்கிற கட்டுரையில் மிக விரிவாக எழுதியுள்ளார் இ.பா.சிந்தன்.

பிப்ரவரி மற்றும் மார்ச் மாத இதழ்களில் முற்பட்ட சாதிகளில் உள்ள பொருளாதார ரீதியாக பின்தங்கியவர்களுக்கு பத்து சதவீத இடஒதுக்கீடு குறித்தும், பொதுவாக இடஒதுக்கீடு குறித்த மார்க்சிஸ்ட் கம்யூனிஸ்டு கட்சியின் நிலைபாடு குறித்தும் தோழர் கே. பாலகிருஷ்ணன் எழுதி வந்த “இட ஒதுக்கீடு சிபிஐ (எம்) அணுகுமுறை” என்கிற கட்டுரையின் இறுதிப் பகுதி இந்த இதழில் வெளியாகிறது.

மோடி ஆட்சியில் எல்லா துறைகளும் மிக மோசமான பாதிப்பை அடைந்துள்ளன. குறிப்பாக பணமதிப்பு நீக்கம், ஜி.எஸ்.டி உள்ளிட்ட நடவடிக்கைகளால் வேலைவாய்ப் பென்பது இக்காலத்தில் மிக மோசமான நிலைக்கு சென்றுள்ளது. கடந்த 45 ஆண்டுகள் இல்லாத வகையில் வேலைவாய்ப்பின்மை உயர்ந்துள்ளது. சரியான இடைவெளியில் வேலை பற்றிய கணக்கெடுப்புகளும் நடைபெற்று வந்தன. அந்த கணக்கெடுப்புகள் மோடியின் ஆட்சி காலத்தில் வேலைவாய்ப்பில் ஏற்பட்டுள்ள மோசமான பாதிப்புகளை தெளிவாக எடுத்துக் காட்டுகிறது. கணக்கெடுப்பு முறைகளையும் அது வெளிக்கொணரும் அம்சங்களையும் விளக்கி தோழர் வெங்கடேஷ் ஆத்ரேயா அவர்களின் “இந்தியாவில் வேலையின்மை நெருக்கடி” என்ற கட்டுரை விளக்குகிறது.

தொடர்ந்து வெளியாகும் மார்க்சிய சொல்லகராதியின் நான்காம் பகுதியில் இயக்கவியலின் இரண்டாம் விதி விளக்கப்பட்டுள்ளது.

எப்போதும் போல் வாசகர்களும், வாசகர் வட்ட பொறுப்பாளர்களும் இதழ் பற்றிய கருத்துக்களை ஆசிரியர் குழுவிற்கு அனுப்ப வேண்டுகிறோம். மார்க்சிஸ்ட் இதழின் சந்தாவை அதிகரித்திட கூடுதல் கவனம் செலுத்துமாறும் கேட்டுக் கொள்கிறோம்.

 – ஆசிரியர் குழு

தேவிபிரசாத் நூற்றாண்டு சிறப்பு மார்க்சிஸ்ட் இதழில் …

தேவிபிரசாத் சட்டோபாத்யாயாவின் நூற்றாண்டை முன்னிட்டு (19.11.1918 – 8.5.1993)  சமீபத்தில் சென்னையில்  சிறப்பு  கருத்தரங்கம் நடைபெற்றது குறித்தும், அதில் முன்வைக்கப்பட்ட கருத்துரைகள் வரவிருக்கும் மார்க்சிஸ்ட் இதழில் பிரசுரிக்கப்படும் என்றும் சென்ற இதழில் அறிவித்திருந்தோம். கட்டுரைகளின் அளவு அதிகமாக இருந்தாலும், கட்டுரையின் உள்ளடக்கம் கருதி முழுமையாக கொண்டு வரும் நோக்கோடு இந்த இதழ் தேவிபிரசாத் சட்டோபாத்யாயாவின் நூற்றாண்டு சிறப்பிதழாக கொண்டுவரப்படுகிறது.

இவ்விதழில் தேவிபிரசாத் சட்டோபாத்யாயாவின் பங்களிப்புகள் குறித்து கருத்தரங்கில் முன்வைக்கப்பட்ட இரண்டு கட்டுரைகள் பிரசுரிக்கப்பட்டுள்ளன. 

 “அறிவியல், தத்துவம் – ஊடாடல்: தேவிபிரசாத் சட்டோபாத்யாயாவின் பதிவுகள்” என்ற முதல் கட்டுரையை  தோழர் பி கே.ராஜன் எழுதியுள்ளார். சற்று நீளமான கட்டுரையானாலும், நிதானமாக படித்து உள்வாங்க வேண்டிய கட்டுரையாகும் இது. பண்டைய இந்திய தத்துவத்தில் அறிவியல், கணிதம், மருத்துவம்  உள்ளிட்டவற்றின் பங்கு பாத்திரம் பற்றிய சட்டோபாத்யாயாவின் பதிவுகளை இக்கட்டுரை சிறப்பாக எடுத்தியம்புகிறது.

 “வேதாந்தம் குறித்து சட்டோபாத்யாயா” என்ற  பேரா. இரா. முரளியின்  கட்டுரை இந்திய தத்துவத்தில் வேதங்கள் முன்வைத்த கருத்துமுதல்வாதத்தை எதிர்த்த பொருள்முதல்வாதப் போக்கையும், கடந்த காலத்தை கண்மூடித் தனமாகப் புனிதப்படுத்தும் போக்கையும் சட்டோபாத்யாயா சுட்டிக்காட்டி விளக்கும் விதத்தை விதந்து பேசுகிறது.

1982 ஆம் ஆண்டு ஏப்ரல்  மாத “சோஷியல் சயின்டிஸ்ட்” இதழில் தேவிபிரசாத் சட்டோபாத்யாயாவின் “தத்துவவாதி லெனின்” என்ற நூல் குறித்து தோழர் இ.எம்.எஸ். நம்பூதிரிபாட் விரிவான விமர்சனக் கட்டுரை ஒன்றை எழுதியிருந்தார்.   நூல் விமர்சனம் என்றாலும் தோழர் இ.எம்.எஸ். பல தத்துவார்த்த விவாதங்களை இதில் கொண்டுவந்துள்ளதன் அவசியத்தை கருத்தில் கொண்டு இங்கு தோழர் ச.லெனின் மொழியாக்கத்தில் பிரசுரிக்கப்படுகிறது.

இந்திய ஜனநாயக வாலிபர் சங்கத்தின் தமிழ் மாநில மாநாட்டில் வெளியிடப்பட்ட தோழர் என்.குணசேகரன் அவர்களின் “மறுவாசிப்பில் திராவிட இயக்கம்” என்ற நூல் குறித்த விமர்சனத்தை ஆய்வாளர் சூரியன் அவர்கள் வழங்கி யுள்ளார். மேலும் விவாதிக்க வேண்டிய பல அம்சங்களும் இதில் குறிப்பிடப் பட்டுள்ளன.

ஏகாதிபத்திய தலையீட்டின் புதிய வடிவம்: வெனிசுவேலாவில் அமெரிக்கத் தலையீடு” என்ற தோழர் பிரபாத் பட்நாயக்கின் கட்டுரை காலத்தின் தேவை கருதி “பீப்பிள்ஸ் டெமாக்ரசி” இதழில் இருந்து தோழர் கிரிஜா அவர்களின் மொழி பெயர்ப்பில் வெளியாகிறது.

மார்க்சிய சொல்லகராதியின் மூன்றாம் பகுதியாக, இயக்கவியலின் முதல் விதியான “அளவு மாற்றம் தன்மை மாற்றத்திற்கு இட்டுச் செல்லும்” என்ற விதி இந்த இதழில் விளக்கப்பட்டுள்ளது.

“மார்க்சிஸ்ட்” இதழின் சந்தா சேர்ப்பில் வாசகர்கள் கவனம் செலுத்திடுமாறும், வாசகர் வட்டங்களில் வரும் கருத்துக்களை ஆசிரியர் குழுவிற்கு தெரியப்படுத்து மாறும் கேட்டுக்கொள்கிறோம்.

-ஆசிரியர்குழு

(ஏப்ரல் 2019)

மார்ச் 2019 மார்க்சிஸ்ட் இதழில் …

மார்ச் மாத மார்க்சிஸ்ட் இதழில் வெளியான கட்டுரைகள்.

  1. இயக்கவியல் கண்ணோட்டத்தில் அடையாள அரசியல்
  2. வர்க்கப் புரட்சியின் ஜனநாயக உள்ளடக்கமும், சோசலிச உள்ளடக்கமும்
  3. இந்திய தத்துவ மரபின் ஒளிவிளக்கு
  4. ரஷ்ய சமூக ஜனநாயக தொழிலாளர் கட்சியின் லண்டன் காங்கிரஸ்: ஒரு பிரதிநிதியின் குறிப்பு …
  5. இட ஒதுக்கீடு: மார்க்சிஸ்ட் கட்சியின் அணுகுமுறை